Sviku fé út úr bönkum til að senda bíla úr landi

Tveir menn á fimmtugsaldri hafa verið ákærðir fyrir að svíkja töluverðar fjárupphæðir út úr fjórum bönkum í borginni Des Plaines í Illinois-ríki í Bandaríkjunum, nota peningana til að fjármagna bílalán og senda bifreiðarnar svo til Póllands þar sem þær voru seldar á svörtum markaði.

Mennirnir framvísuðu fölsuðum skilríkjum, kaupsamningum og fleiri gögnum og sviku út allt að 120.000 bandaríkjadali, jafnvirði rúmlega níu milljóna króna, til bifreiðakaupanna. Ekki er enn ljóst hve margar bifreiðar mennirnir keyptu og fluttu úr landi en þeir eru nú í haldi lögreglu í Skokie í Illinois og bíða réttarhalda.