Kim Jong-il talinn hafa fengið annað heilablóðfall

Bandarískum yfirvöldum hafa borist fregnir af því að Kim Jong-il, leiðtogi Norður-Kóreu, hafi fengið heilablóðfall á nýjan leik í október.

Það var í sumar sem fréttir bárust fyrst af því að leiðtogi Alþýðulýðveldisins Norður-Kóreu hefði fengið heilablóðfall og væri algjörlega frá störfum. Norður-Kóreumenn þverneituðu þessu en grunsamlegt þótti að í heila tvo mánuði sást hvorki tangur né tetur af leiðtoganum og sótti hann ekki stóratburði á vegum hersins sem hann hafði aldrei misst af áður.

Nú berast fregnir af því að undir síðustu mánaðamót hafi hann fengið heilablóðfall á ný og nú með þeim afleiðingum að hann eigi í vandræðum með hreyfingar vinstri hand- og fótleggs auk þess sem honum sé nokkuð tregt um mál. Kim Jong-il hefur ekki verið þekktur fyrir að vera mjög viðræðuglaður maður svo þetta síðasta breytir ef til vill ekki miklu en eins og fyrri daginn rjúka áróðursmesitarar leiðtogans upp til handa og fóta og lýsa því hástöfum yfir að stjórn landsins sé í öruggum höndum og Kim eigi ekki í nokkrum vandræðum með að gefa skipanir.

Sumar kenningar hafa þó gengið svo langt að telja leiðtogann löngu látinn og að staðgenglar hafi komið fram fyrir hans hönd mánuðum saman. Hver veit?