Veik staða Olmerts

Lögfræðingar Ehuds Olmerts, forsætisráðherra Ísraels, reyndu í dag að gera framburð lykilvitnis í meintu spillingarmáli ótrúverðugan.

Olmert er ásakaður um að hafa þegið fleiri hundruð þúsund dollara frá athafnamanninum Morris Talansky til að standa undir lúxus lífsstíl á meðan hann var borgarstjóri í Jerúsalem á árunum 1993-2003.

Talið er líklegt að málaferlinn standi í einhverja mánuði í viðbót og ljóst er að pólitísk staða Olmerts hefur veikst hvort heldur sem forsætisráðherra eða leiðtogi Kadima flokksins.

Frá því að Ariel Sharon fékk heilablóðfall í byrjun árs 2006 hefur Olmert verður formaður Kadima flokksins en nú hefur verið ákveðið að sérstök kosning um embætti formanns fari fram í september næst komandi. Fastlega er gert ráð fyrir því að Olmert sækist eftir endurkjöri en að sama skapi er ljóst að á brattann verður að sækja fyrir hann.

Tilfinningar almennings í Ísrael hafa verið blendnar í tengslum við samkomulag Ísraela og Hisbollah um fangaskiptin í gær. Þar voru líkamsleifar tveggja ísraelskra hermanna afhentar í staðinn fyrir fimm fanga og líkamsleifar 200 palestínskra og líbanskra manna sem grafnar voru upp í síðustu viku.

Ránið á ísraelsku hermönnunum leiddi til 33 daga stríðs á milli Ísraels og Hisbollah í suðurhluta Líbanon sumarið 2006. Á sama tíma hrundu vinsældir Olmerts í Ísrael og er stuðningur við hann í dag ekki mikill.

Olmert reynir þessa dagana að framlengja pólitískt líf sitt með því að vinna að friði við Palestínumenn.