Saka Frakka um aðild að þjóðarmorðum í Rúanda

Þrjátíu og þrír franskir stjórnmálamenn og yfirmenn í franska hernum studdu og komu að þjóðarmorðunum í Rúanda árið 1994 og það þarf að draga þá til ábyrgðar. Þetta kemur fram í nýrri skýrslu sem sérstök rannsóknarnefnd vann fyrir stjórnvöld í Rúanda um aðild Frakka að blóðbaðinu.

Um átta hundruð þúsund manns féllu í þjóðernishreinsunum Hútúættflokksins sem stóðu yfir í skamman tíma árið 1994. Meðal þeirra sem nefndir eru ábyrgir í skýrslunni eru Francois Mitterand, fyrrverandi forseti Frakklands, og Dominque de Villepin, fyrrverandi forsætisráðherra.

Stjórnvöld í Kigali hafa áður sakað Frakka um að reyna að breiða yfir hlut sinn í málinu en þeir eru sagðir hafa þjálfað hermenn sem tóku þátt í blóðbaðinu fyrir um 14 árum. Þessu hafa Frakkar hafnað og segja hersveitir sínar hafa verndað íbúa í Rúanda þegar blóðbaðið stóð yfir.