Aron Pálmi ánægður í eigin íbúð

Aron Pálmi Ágústsson, sem kom hingað til lands í sumar, eftir 10 ára refsivist í Bandaríkjunum, segir að vel gangi að aðlagast Íslandi. Aron starfar nú á Fannborg, sem er hæfingarstöð fyrir fatlað fólk á Reykjanesi og segir að sér líki starfið vel. „Þetta er gott og mjög þakklátt starf. Í lok hvers dags sér maður að maður hefur gert eitthvað sem skiptir máli," segir Aron Pálmi.

Þá segist Aron vera kominn í eigin íbúð í Kópavogi. „Hún er ekki stór, einungis 67 fermetrar, en það er nægjanlegt fyrir einn mann," segir Aron. Hann segist kunna vel við sig í Kópavogi, því að þar búi öll fjölskyldan hans.

Nú eru liðnir rúmir sex mánuðir frá því að Aron kom til Íslands. Hann segir að vel hafi gengið að aðlagast landinu með hjálp frá vinum og kunningjum. Hann segist vera í reglulegu sambandi við Einar Einarsson, hjá RJF hópnum, en einnig hafi hann eignast góða vini í skólanum og í vinnunni.

Aron segir að stefnan sé enn tekin á sálfræðinám í HÍ í ágúst og kveðst hlakka mikið til.

Vísir ræddi við yfirmenn Arons Pálma, á Svæðisskrifstofu málefna fatlaðra á Reykjanesi, sem bera honum vel söguna. Hann sé búinn að starfa hjá þeim í fimm mánuði. Hann hafi fengið tímabundna ráðningu fyrst í stað og hafi komið ákaflega vel út úr hæfnismati sem hafi verið gert eftir þriggja mánaða starf.