Regína syngur lag fyrir ABC barnahjálp

ABC barnahjálp setur markið hátt í tilefni af 20 ára afmæli sínu og stefnir að því að tvöfalda þann fjölda barna sem njóta stuðnings starfsins. Það þýðir að félagið myndi framfleyta tíu þúsund fleiri börnum fyrir árslok.

Í tilkynningu frá ABC barnahjálp segir að lagið „Colors of Love", í flutningi Regína Óskar og Gospelkórs Reykjavíkur, komi út á morgun. Laginu er ætlað að vekja athygli á starfseminni og að hvetja fólk til að gleyma ekki þeim sem búa við fátækt og eigi ekki kost á lágmarks menntun.

Bylgjan, sem einnig fagnaði 20 ára afmæli sínu ekki alls fyrir löngu hefur ákveðið að leggja sitt lóð á vogarskálarnar, eins og raunar ýmis önnur fyrirtæki og einstaklingar. Á heimasíðu Bylgjunnar verður hægt að sækja lagið og horfa á myndband við það ásamt því að nálgast upplýsingar um hvernig er hægt að gerast fósturforeldri barns.