UPS-smyglið staðið yfir síðan 2005

Í gögnum sem lögregla hefur lagt fyrir Héraðsdóm Reykjavíkur og Hæstarétt kemur fram að grunur leiki á að hraðsendingarsmyglið sem upp komst á Keflavíkurflugvelli í nóvember hafi staðið yfir síðan á vormánuðum 2005.

Málið komst upp þegar rúmlega fimm kíló af hvítum efnum fundust við

eftirlit lögreglu og tollgæslu í bifreið á vegum hraðflutningafyrirtækisins UPS.

Einn starfsmaður UPS, Tómas Kristjánsson, var handtekinn og hefur hann setið í gæsluvarðhaldi síðan. Tveir bræður voru einnig handteknir og úrskurðaðir í gæsluvarðhald, en þeim var síðar sleppt.

Þegar rannsókn málsins var vel á veg komin var handrukkarinn Annþór Kristján Karlsson handtekinn og hnepptur í gæsluvarðhald. Hann hefur setið í gæsluvarðhaldi síðan ef frá er talinn einn dagur sem Annþór eyddi á flótta undan lögreglu.

Í gögnum lögreglu kemur fram að Annþór sé grunaður um að fjármagna smyglið og skipuleggja það. Þá er hann einnig grunaður um að hafa tekið á móti fíkniefnum sem smyglað var til landsins.

Annþór hefur neitað aðild að málinu. Lögreglu finnst hins vegar framburður hans mjög ótrúverðugur þar sem hann hafi orðið margsaga um einstök atvik málsins.

Rannsókn lögreglu á málum Annþórs hefur einnig leitt í ljós að hann eigi fjölda eigna sem hann hafi skráð á annað fólk í því skyni að blekkja yfirvöld. Hann hafi hins vegar ekki viljað tjá sig um fjárhag sinn og eignastöðu í yfirheyrslum.