Forsætisráðherra sakaður um ESB-andúð

Forsætisráðherra var sakaður um andúð í garð Evrópusambandsins og alls sem Evrópu tengdist í óundirbúnum fyrirspurnum á Alþingi í dag. Ráðherra sagði hins vegar að þvert á móti hefði hann samúð með hvoru tveggja.

Steingrímur J. Sigfússon, formaður Vinstri - grænna, innti forsætisráðherra eftir stefnu ríkisstjórnarinnar í Evrópumálum og ekki síst gjaldmiðilsmálum. Vísaði hann til þess að Ingibjörg Sólrún Gísladóttir utanríkisráðherra hefði talað um krónuna sem viðskiptahindrun og þá væri viðskiptaráðherra mjög hlynntur evrunni.

Nú síðast hefði Þorgerður Katrín Gunnarsdóttir, varaformaður Sjálfstæðisflokksins, lýst því yfir að sjálfsagt væri að fyrirtæki gætu gert upp í evrum og vísaði þar til umsóknar Kaupþings þar um. Sagði Steingrímur að ágreiningur væri í Evrópumálum milli stjórnarflokkanna og líka innan flokka því formaður og varaformaður Sjálfstæðisflokksins gengju ekki í takt.

Geir H. Haarde forsætisráðherra sagði það rangt að hann og Þorgerður Katrín gengju ekki í takt. Sagði hann eðlilegt að fyrirtæki gerðu upp í þeirri mynt sem þau vildu svo framarlega sem þau uppfylltu skilyrði alþjóðlegu reikningskilastaðlanna eins og lög kvæðu á um. Yfir 200 fyrirtæki gerðu það nú, þar af um helmingur í dollurum og 70 fyrirtæki í evrum.

Sagði hann um málefni fjármálafyrirtækjanna að mál Kaupþings væri nú til meðferðar hjá fjármálaráðherra og hann myndi ekki segja honum fyrir verkum. Sagði Geir enn fremur að ekki stæði til að gera breytingar í gjaldmiðlamálum á næstunni.

Steingrímur kallaði eftir skýrari svörum og það gerði einnig Valgerður Sverrisdóttir, varaformaður Framsóknarflokksins, í sinni fyrirspurn. Sagði hún það skýrasta sem fram hefði komið frá forsætisráðherra að ef ætlunin væri að breyta gjaldmiðlamálum væri dollarinn betri kostur.

Geir H. Haarde sagði að hann hefði einungis verið að benda á að mikið af viðskiptum Íslendinga færu fram í dollurum og hlutdeild dollarans ykist með auknum álviðskiptum. Menn yrðu að horfa á heildarmyndina.

Valgerður sagði svar ráðherra skrítið og að það byggðist á andúð hans og Sjálfstæðislfokksins á Evrópusambandinu, evrunni og öllu því sem Evrópu tengist. Hann væri að fela sig á bak við dollarann þegar flestallir töluðu um evruna sem vænlegri kost.

Forsætisráðherra sagði það af og frá að hann hefði sérstaka andúð á ESB, evrunni og Evrópu. „Þvert á móti hef ég mikla samúð með þessu öllu saman," sagði Geir.