Ríkisstjórnin gagnrýnd fyrir máttlitlar mótvægisaðgerðir

Varaformaður Framsóknarflokksins óttast atgervisflótta úr fiskvinnslu í kjölfar fjölmargra uppsagna á síðustu mánuðum og vill að stjórnvöld bjóði því fólki sem þar missir vinnuna tækifæri til menntunar því að kostnaðarlausu. Ríkisstjórnin var gagnrýnd fyrir aðgerðarleysi í málefnum þessa hóps.

Valgerður Sverrisdóttir, varaformaður Framsóknarflokksins, vakti athygli á því í óundirbúnum fyrirspurnum á Alþingi í morgun að nánast daglega bærust fréttir af uppsögnum í fiskvinnslu og hafi nú hundruð manna nú misst vinnuna. Þetta hefði verið fyrirséð vegna þeirrar ákvörðunar ríkisstjórnarinnar að skera niður þorsskvóta á yfirstandandi fiskveiðiári.

Ríkisstjórnin hefði kynnt mótvægisaðgerðir en hún teldi þær ófullnægjandi. Benti hún á tillögu framsóknarmanna í málinu þess efnis að fólk sem missti vinnuna í fiskvinnslu gæti aflað sér menntunar á kostnað stjórnvalda í tiltekinn tíma. Spurði hún Geir H. Haarde forsætisráðherra hvort ríkisstjórnin myndi beita sér fyrir að þessi hugmynd fengi brautargengi.

Forsætisráðherra sagði ekki hægt að svara þessari fyrirspurn Valgerðar óundirbúið en sagði ástandi alvarlegt eins og allir vissu. Benti hann á að framsóknarmenn hefðu lagt til 150 þúsund tonna þorskkvóta í stað 130 þúsund tonna en þau 20 þúsund tonn sem munaði hefðu ekki breytt miklu um uppsagnirnar sem rætt væri um.

Stjórnvöld hefðu tekið ábyrga ákvörðun til þess að byggja upp þorskstofninn til framtíðar. Í millitíðinni skapaðist ástand og mótvægisaðgerðum væri ætlað að vinna gegn því. Þótt allar aðgerðirnar gögnuðust ekki fiskvinnslufólki beint þá myndu þær veita innspýtingu á viðkomandi svæðum. Kallaði hann eftir því að menn tækju höndum saman í málinu og fagnaði sérstaklega ábyrgum viðbrögðum verkalýðsforystunnar.

Valgerður sagðist óttast atgervisflótta úr greininni. Það væri gott að tala um að mála hús og annað en það væri mikilvægt að missa ekki fólkið úr sjávarútveginum. Þess vegna væri hugmynd framsóknarmanna góð og vildi Valgerður að hún yrði tekin með þegar tekið væri á vandanum.

Geir H. Haarde sagði allar góðar hugmyndir verða teknar með í áframhaldandi vinnu stjórnvalda í málinu. Þegar væri búið að skipa nefndir sem ættu að fjalla um þau svæði á landinu sem stæðu höllum fæti og hagvöxtur væri lítill.

Ögmundur Jónasson, þingmaður Vinstri - grænna, tók undir með Valgerði Sverrisdóttur um að mótvægisaðgerðir stjórnvalda dygðu ekki. Staðan gæfi hins vegar innsýn í tvö atriði, aðgerðaleysi ríkisstjórnarinanr og ranglátt kvótakerfi þar sem eigendur kvóta gætu ráðstafað lífi og atvinnu heilu byggðarlaganna.