Litháar í farbanni til 1. febrúar

Litháarnir fimm sem réðust gegn lögreglumönnum við skyldustörf aðfaranótt 11. janúar hafa verið úrskurðaðir í farbann til 1. febrúar að beiðni lögreglunnar á höfuðborgarsvæðinu.

Undanfarna viku hafa mennirnir setið í gæsluvarðhaldi vegna málsins en þeir eru á aldrinum 19-25 ára. Þrír þeirra voru handteknir á vettvangi en tveir á heimili sínu í Reykjavík.

Það var við hefðbundið fíkniefnaeftirlit sem var veist að lögreglumönnunum en þeir voru að sinna máli sem var árásarmönnunum óviðkomandi með öllu.

Eftir átök á vettvangi þurftu fjórir lögreglumenn að leita sér aðhlynningar á slysadeild en tveir þeirra voru fluttir þangað með sjúkrabíl en hinir voru með minni áverka. Þrír voru útskrifaðir eftir skoðun en þeim fjórða var haldið þar mun lengur en sá er enn frá vinnu.