Mjölnis er sárt saknað

Sjö mánaða gömlum labradorhvolpi var stolið fyrir utan Fjölbrautaskólann í Breiðholti í gærdag og hefur hópur manna leitað að honum síðan. Marvin Michelsen, eigandi hvolpsins, segir að hann hafi brugðið sér inn í skólann í 20 mínútur og bundið hundinn við ljósastaur. Það var um klukkan hálfþrjú í gærdag.

Þegar hann svo sneri út aftur var hundurinn horfinn. Myndband úr öryggismyndavél við Fjölbrautaskólann sýnir hvar maður kemur aðvífandi og stelur hundinum og heldur á brott en erfitt er að greina hver var þar á ferðinni. Marvin segir í samtali við Vísi að hann hafi tilkynnt lögreglunni um þjófnaðinn og þá hafi stór hópur fólks hjálpað honum að leita hundsins víða í Breiðholti í gær.

Hvolpurinn er blanda af boxer og labrador og nefnist Mjölnir. Hann er kolsvartur með örlitla skellu á bringunni. Mjölnir var með svarta ól með nöglum og rauðan taum. Marvin biður alla þá sem veitt geta upplýsingar í málinu að hafa samband í ssíma 847-5683 og 868-6007, eða láta lögregluna vita í síma 444-1000.