Bush áætlar að létta banni við olíuborun við strendur BNA

Forseti Bandaríkjanna, George Bush áætlar að aflétta banni við því að bora eftir olíu við strendur landsins. Þing Bandaríkjanna þarf aftur á móti einnig að samþykkja að aflétta bannið til þess að mögulegt sé að bora eftir olíu við strendur Bandaríkjanna.

Markmiðið með afléttun bannsins er að reyna að sporna við hækkandi olíverði en bannið var sett til að vernda ferðamennskuiðnað við strendur landsins. Bannið var sett á árið 1981 af þinginu og síðan einnig árið 1990 af George Bush eldri.

Bush hefur heitið á þingið að aflétta banninu en vill ekki bíða lengur heldur aðhafast strax en þingið hefur ekki tekið í sama streng og forsetinn. Hafa þingmenn úr röðum Demókrataflokksins gagnrýnt forsetann fyrir að vilja „bora" sig út úr olíuvandanum.