Áhættumat ef selja á ógerilsneydda mjólk

„Samkvæmt núgildandi reglum er sala á ógerilsneyddri mjólk bönnuð," segir Sigurður Örn Hansson, forstöðumaður hjá Matvælastofnun, inntur eftir viðbrögðum við tillögu Landssambands kúabænda um að leyfa sölu á ógerilsneyddri mjólk en Fréttablaðið fjallar um hana í dag.

„Reyndar hefur verið leyft að selja broddmjólk með ákveðnum skilyrðum, slík kemur úr fyrstu mjöltum eftir burð, en alla mjólk til sölu þarf samt sem áður að hitameðhöndla og eyða þar með í henni hugsanlegum sýklum. Á sínum tíma voru það berklar en það er líka listería, kamfýlóbakter, salmonella og kólígerlar sem um er að ræða," útskýrir Sigurður.

Sigurður segir Dani búa við rýmri reglur enda vinni þeir eftir nýrri löggjöf ESB um matvælaeftirlit og -vinnslu en Landssamband kúabænda styður mál sitt með því að þar í landi megi selja ógerilsneydda mjólk frá kúabúum sem uppfylli ákveðin skilyrði. „Það er þannig að hvert ríki innan ESB getur sett sínar reglur, svokallaðar landsreglur. Aðildarlöndin geta líka alltaf gert kröfu um gerilsneyðingu og við vinnum eftir þeirri reglu að það eigi að gerilsneyða mjólk fyrir sölu," segir hann enn fremur.

„Það hefur ekki verið fjallað um þetta beinlínis hér en krafan er sú að matvæli séu örugg til neyslu. Eigi að slaka á þeirri kröfu verður það ekki gert nema að undangengnu áhættumati og slíkt mat hefur ekki farið fram enda ekki beðið um það. Oft er vísað í nágrannalöndin og þetta sem kúabændur eru að vísa í er ekki beinlínis þannig að bændur séu með einhverja verslun á bæ sínum heldur mega þeir selja þeim sem koma til þeirra og biðja um að fá að kaupa gerilsneydda mjólk," segir Sigurður að lokum.