Myndir af vélinni sem fórst undan ströndum Íslands í gær

Cessna 310 vélin sem fórst seinnipartinn í gær var seld þann 1. febrúar síðastliðinn til fyrirtækis í Bandaríkjunum að nafni ILS inc. Ekki hefur náðst í forsvarsmenn fyrirtækisins til að fá upplýsingar um ferðir vélarinnar en heimildarmenn Vísis segja að líklega hafi verið um svokallað ferjuflug að ræða. Það er þegar kaupandi flugvélar, eða einhver á hans vegum, fer með vél sem hann hefur nýleg keypt á þann stað sem hann ætlar að geyma vélina. Flugmaðurinm sem var um borð í vélinni sem fórst var breskur og því hafi líkur verið leiddar að því að hann hafi ætlað til Englands.

Hér fyrir neðan er myndaalbúm sem hefur að geyma ljósmyndir af vélinni sem fórst í gær.

Vélin sem fórst var framleidd árið 1968. Hún var hins vegar tekin í gegn árið 1998 að sögn þeirra sem höfðu milligöngu um sölu hennar fyrir skemmstu. Söluverð hennar var um 129 þúsund bandaríkjadollarar eða tæpar níu milljón íslenskra króna.

Eins og fyrr segir gekk fyrirtækið ILS frá kaupum Cessna vélarinnar þann 1. febrúar. Heimildir Vísi herma að seljandinn sé staðsettur í Flórida. Á þriðjudaginn síðasta var vélinni flogið þaðan áleiðis til Suffolk í Virginíu fylki og þaðan áleiðis norður til New York. Á miðvikudaginn síðasta var vélinni svo flogið frá Albany í New York fylki til Sept Iles eyju í Quebec í Kanada. Í gær var henni svo flogið til Goose Bay í Kanada og þaðan áfram til Narsarsuaq á Grænlandi.

Í morgun hélt vélin svo frá Grænlandi og var henni stefnt til Reykjavíkur. Það var á þeirri leið sem annar hreyfill vélarinnar gaf sig með þeim afleiðingum að hún hrapaði í sjóinn um 50 sjómílum vestur af Keflavík.

Flugmaður vélarinnar er talinn af.