Vilja að Brown sparki Miliband

Tveir þingmenn breska Verkamannaflokksins vilja að Gordon Brown, forsætisráðherra og leiðtogi flokksins, víki David Miliband, utanríkisráðherra, úr ríkisstjórnina vegna blaðagreinar sem hann ritaði nýverið.

Geraldine Smith og Bob Marshall-Andrews eru ósátt með Miliband og Smith segir hann hafa ,,farið yfir línuna" með skrifum sínum. Hún telur líklegt ef Miliband verði settur á nýjan leik á ,,varamannabekkinn" að hann muni innan tíðar verða flestum gleymdur líkt og hann var áður en Brown gerði hann að utanríkisráðherra fyrir ári síðan.

Miliband sem er ein helsta vonarstjarna Verkamannaflokksins hefur sagt að hann stefni að svo stöddu ekki á að verða leiðtogi flokksins. Þetta fullyrti hann í gær þrátt fyrir að hafa skrifað grein í The Guardian um framtíð Verkamannaflokksins án þess að minnast einu orði á Gordon Brown.

Breskir fjölmiðlar héldu því fram um seinustu helgi að verið væri að skipuleggja atlögu gegn Brown. Síðan þá hafa ráðherrar og áhrifamenn innan Verkamannaflokksins hafa keppst við að lýsa yfir stuðningi við Brown og segja alrangt að verið sé að skipuleggja hallarbyltingu innan flokksins. Síðan þá hafa tveir þingmenn farið fram á að Brown segi af sér.

Ljóst er að vandræðagangi Verkamannaflokksins er hvergi nærri lokið.