Paltrow segir Britney með Stokkhólms-heilkenni

Fjöldi stjarna hefur undanfarin misseri tjáð sig um meðferð fjölmiðla á Britney Spears, og nú hefur Gwyneth Paltrow bæst í þann hóp.

Paltrow er sjálf enginn aðdáandi paparassa, og skilur því vel að Britney hafi gengið illa að fóta sig með hjörð þeirra í kringum sig öllum stundum. Raunar vill hún meina að ljósmyndararnir og fjölmiðlar hafi gert söngkonuna geðveika. Haft er eftir Paltrow á digitalspy að paparassarnir og tímaritin séu blóðug upp að öxlum, og beri alla ábyrgð á vafasömu sálrænu ástandi Britney.

Hún talar einnig um samband Britney við ljósmyndarann Adnan Galib, sem hún segir ekki allskostar heilbrigt. „Britney er með afar dæmigert Stokkhólms heilkenni. Hún féll fyrir paparassa, og varð geðveik. Ljósmyndararnir og tímaritin eru með svo slæmt karma. Þetta er frekar ógeðslegt."