Framganga Brown skilar honun engu

Bretar eru ánægðir með framgöngu Gordons Brown síðustu daga en mikið hefur borið á breska forsætisráðherranum í þeirri fjármálakrísu sem nú skekur heiminn. Það þýðir samt ekki fylgisaukningu hjá flokki hans. Margir hafa sagt að harka Brown gagnvart Íslendingum hafi stafað af því að hann hafi verið á atkvæðaveiðum, hann hafi séð sóknarfæri í því að gagnrýna Íslendinga með von um að það aflaði honum fylgis á meðal breskra kjósenda. Íhaldsflokkurinn hefur síðustu misserin haft yfirburði í skoðannakönnunum á Bretlandi og það hefur ekki breyst ef marka má nýja könnun breska blaðsins The Guardian.

Samkvæmt könnuninni sem blaðið segir frá á heimasíðu sinni í kvöld hefur framganga Brown engu skilað. Fylgi Verkamannaflokksins er 30 prósent og íhaldsmenn mæast með 42 prósent. Þetta eru sömu tölur og í síðasta mánuði.

Í könnuninni kemur fram að 60 prósent aðspurða eru ánægðir með framgöngu forsætisráðherrans á síðustu dögum, en sú ánægja nægir ekki til þess að fólk skipti um skoðun og ákveði að kjósa frekar Verkamannaflokkinn. Aðeins þrettán prósent þeirra sem segjast ánægðir með Brown segja líklegra að þeir kjósi hann nú en áður.