Hælisleitandi handtekinn á ný

Lögreglan á Suðurnesjum handtók í dag mann í húsnæði hælisleitenda að Fitjum. Að sögn lögreglu þurfti að taka mannin úr umferð þar sem hann var ekki í „jafnvægi", eins og það var orðað.

Grunur lék á að maðurinn væri vopnaður hnífi og klæddust lögreglumenn skotheldum vestum í aðgerðinni. Maðurinn veitti þó ekki mótspyrnu og fór friðsamlega í fylgd lögreglu úr húsnæðinu. Hann situr nú í fangaklefa í Reykjanesbæ en ekki hefur verið tekin ákvörðun um hvort krafist verði gæsluvarðhalds.

Heimildir Vísis herma að þarna sé á ferðinni sami maður og lögregla handtók daginn sem húsleit var framkvæmd að Fitjum. Þá var hann dæmdur af Héraðsdómi Reykjaness í sex vikna gæsluvarðhald á grundvelli útlendingalaga. Hæstiréttur felldi síðar þann úrskurð úr gildi og vakti það hörð viðbrögð hjá lögreglumönnum á Suðurnesjum og forstjóra Útlendingastofnunar.