Samstarf við einkaaðila betra en samkeppni

,,Á meðan Íslandspóstur er ríkisfyrirtæki á það að sinna sinni kjarnastarfsemi og ekki vera í samstarfi eða samkeppni við einkaaðila hvort sem það er á þessu sviði eða öðrum," segir Sigurður Kári Kristjánsson alþingismaður og bætir við að samkeppnisaðstaða einkarekinna fyrirtækja við slíkar aðstæður geti aldrei talist jöfn eða sanngjörn.

Verslanir Hans Petersen og Íslandspóstur hafa hafið samstarf um framköllunarþjónustu í pósthúsinu að Síðumúla. Þangað er hægt að koma með myndir í framköllun en á pósthúsinu verða til sölu vörur til sölu vörur tengdar ljósmyndum svo sem rammar, albúm, filmur, rafhlöður og fleira.

Sala á römmum og filmum eru ekki hluti af kjarnastarfsemi Íslandspósts, að mati Sigurðar.

Aftur á móti hugnast Sigurði betur að Íslandspóstur hefji samstarf heldur en samkeppni við einkaaðila. ,,Mér líst betur á það að Íslandspóstur fari í samstarf við einkaaðila frekar heldur en að fyrirtækið fari í samkeppni við þá líkt og Íslandspóstur hefur verið að gera í meira mæli en er mér að skapi."