Fregnir af dauða föðurins stórlega ýktar

Faðir og sonur í Bretlandi eru sameinaðir á ný eftir átta ára aðskilnað en sonurinn sá föður sínum bregða fyrir í sjónvarpi fimm árum eftir að hann var úrskurðaður látinn.

John Delaney hvarf sporlaust árið 2000 og var þá á sjötugsaldri. Þremur árum síðar kvað dánardómstjóri upp þann úrskurð að lík sem fannst í Manchester væri af Delaney. Ýmsir gamlir áverkar á líkinu pössuðu við þá sem Delaney hafði haft og föt sem líkið var klætt voru talin bera vott um klæðaburð hins horfna.

Það var svo á þessu ári sem sonur Delaney sá föður sinn ljóslifandi í þætti breska ríkisútvarpsins BBC um eldri mann sem dvaldi á vistheimili og hafði misst minnið. Þekkti sonurinn föður sinn þar þegar í stað. Við eftirgrennslan kom svo í ljós að John Delaney hafði fundist ráðvilltur á gangi í Oldham skilríkja- og minnislaus. Var honum komið fyrir á vistheimilinu og þar gefið nafnið David Harrison, svona til þess að kalla hann eitthvað.

Sonurinn hafði þegar í stað samband við stjórnendur þáttarins og sagðist ekki vita betur en hann hefði grafið föður sinn árið 2003 en svo séð hann í fullu fjöri á skjánum. Sá gamli var því vakinn upp á ný, fimm árum eftir ætlað andlát.