Úrvinda eftir hvolpauppeldi

„Ég geri þetta aldrei aftur, það er alveg á hreinu," segir Baldur Brjánsson, fyrrverandi töframaður, sem hefur staðið í ströngu undanfarið við uppeldi á fjórum hvolpum.

Baldur hefur átt tvo bolabíta í nokkur ár og fyrir um hálfum mánuði gaut annar þeirra fjórum hvolpum. „Fólk skilur ekki almennilega að fyrstu dagana og vikurnar þarf maður að gefa þessu á tveggja tíma fresti, ekki bara yfir daginn heldur allan sólarhringinn," segir Baldur sem er orðinn úrvinda eftir þessi ósköp. „Maður þakkar bara fyrir ef maður kemur heill út úr þessu á geði," segir hann og hlær.

Baldur hefur reynt að fá hvolpa í þrjú eða fjögur ár og ætlar að selja þá þegar rétti tíminn kemur. Hann segir það rosalega dýrt „sport" að eiga bolabíta. „Tveir fullorðnir hundar eru búnir að kosta mig milljón. Svo er þetta lækniskostnaður og sæðingar. Ég var búinn að fara með hana ótal sinnum í sæðingar en það kom ekkert út úr því. Ég ætlaði að prófa þetta núna og aldrei aftur," segir Baldur, sem sér ekki eftir því að hafa fengið sér bolabítana. „Þetta eru svo miklir karakterar þessir hundar. Eigendur þeirra segja að ef maður eignast „bulldog" þá eignist maður aldrei annað."

Ævisagan Töfrum líkast þar sem Gunnar Kr. Sigurjónsson rekur viðburðaríka ævi Baldurs er komin út. Baldur vill ekki meina að hún hafi verið orðin tímabær, enda sé hann enn þá ungur að aldri. „Hann talaði við mig í fyrra og ég hélt að þetta væri bara eitthvert djók. Mér datt ekki í hug að manninum væri alvara." - fb