Sjö foreldrar létust frá 12 börnum vegna vímuefnaneyslu

Sjö foreldrar sem höfðu haft forsjá tólf barna létust frá þeim af völdum vímuefnaneyslu og geðræns vanda á árinu 2007 og til loka maí í ár. Þetta kemur fram í upplýsingum sem Barnaverndarstofa aflaði í kjölfar mikillar umræðu í fjölmiðlum um aðstæður barna sem fíklar létust frá.

Athugun Barnaverndarstofu náði til alls landsins. Hún leiðir í ljós að barnaverndarnefndir komu að málum 6 mæðra og eins föðurs sem höfðu haft forsjá barns og létust af völdum vímuefnaneyslu og geðræns vanda. Þessir foreldrar áttu samtals 12 börn sem þeir höfðu forsjá yfir sem fyrr segir. Á heimasíðu Barnaverndarstofu segir einnig að tvær mæður og tveir feður sem átt hafi sjö börn, en ekki haft forsjá yfir þeim, hafi látist á sama tímabili.

Félagslegir þættir einkenna ekki hópinn

„Athugunin leiddi jafnframt í ljós að ekki er hægt að greina neina félagslega þætti sem einkenna þennan hóp umfram neysluvanda. Þannig létust forsjáraðilar á ólíkum aldri, eða frá 20 til rúmlega 50 ára aldurs. Þá voru aðstæður þessara aðila mismunandi fyrir andlát; í sumum tilvikum hafði neysla ekki verið fyrir hendi í langan tíma þar til skömmu fyrir andlát, í öðrum tilvikum hafði neysla verið viðvarandi og dæmi er jafnframt um að barnaverndarnefnd hafi ekki öðlast vitnesku um neysluvanda foreldris fyrr en eftir andlát þess," segir á heimasíðu Barnaverndarstofu.

„Á hitt ber að líta að foreldrar með fíknisjúkdóm eru almennt ekki lakari foreldrar en aðrir, takist þeim að halda sig frá vímugjöfum. Því er til mikils vinnandi að styðja þessa foreldra til að leita sér meðferðar við sjúkdómi sínum og viðhalda heilbrigðu lífi svo þeir geti axlað uppeldisábyrgð sína eins vel og frekast er kostur. Barnaverndarstarfsmenn þekkja betur en flestir aðrir hin fjölmörgu dæmi þess að foreldrar hafi náð fullkomnum tökum á sjúkdómi sínum, m.a. með hjálp meðferðarstofnana, og í kjölfarið reynst börnum sínum eins góðir foreldrar og best verður á kosið," segir enn fremur á heimasíðunni.

Þar segir einnig að Barnaverndarstofa muni á næstu mánuðum leita leiða til að styrkja starf barnaverndarnefnda í þessum vandasömu störfum.