3000 breskum vegabréfum stolið

Þjófar í Englandi komust í gær á brott með tæplega 3000 óútfyllt vegabréf og er andvirði þeirra talið nema 2,5 milljón punda.

Ránið var framið um hábjartan dag í borginni Oldham í grennd við Manchester. Talið er öruggt að öryggisverðir hafi ekki farið eftir hefðbundnum reglum en ránið virðist hafa verið vel skipulagt.

Yfirvöld segja að vegabréfin séu ónothæf og gagnist ekki neinum vegna þess að ókláruð vantar í þau þónokkra öryggisþætti. Aftur á móti segja sérfræðingar sem sérhæfa sig í blekkingum og fölsunum að vel sé hægt að nota vegabréfin. Sér í lagi í löndum þar sem tæknin og eftirlit á flugvöllum er ekki eins mikið og víða á Vesturlöndum.