Stuðningsmenn Karadzic safnast saman

Þúsundir þjóðernissinnaðra Serba komu saman í miðborg Belgrad í dag til stuðnings Radovan Karadzic fyrrverandi leiðtoga Bosníu-Serba. Hann hefur verið í haldi í viku og verið ákærður fyrir þjóðarmorð og glæpi gegn mannkyni.

Eftir fund þjóðernissinna  í Belgrad fyrr á þessu ári, þegar þeir voru að mótmæla því að Vesturlönd styddu sjálfstæði Kosovo, fór allt í bál og brand og mótmælendur gengu rænandi og ruplandi um borgina. 

Í dag sýndu stuðningsmenn Radovan Karadzic fyrrverandi leiðtoga Bosníu-Serba stuðning sinn í verki með því að mæta á fundinn í miðborg Belgrad. Í þetta sinn ætluðu stjórnvöld að vera við öllu búin og köllu út fjölmennt lið óreiðalögreglu. Í kosningunum í Serbíu í maí fengu þjóðernissinnar þriðjung atkvæða. Margir sem kusu flokkinn þá vilja ekki frekari samstarf við Vesturlönd.

Karadzic var handtekinn fyrir viku. Hann fór í felur eftir stríðið á Balkanskaga og var í felum í 13 ár. Mikill þrýstingur hefur verið á stjórnvöld í Serbíu að ná Karadzic og var það skilyrði fyrir áframhaldandi viðræðum um hugsanlega inngöngu Serba í Evrópusambandið.

Karazic er ákærður fyrir þjóðarmorð og glæpi gegn mannkyni.