Leitarstríðin - Cuil til höfuðs Google

Leitarvélin Cuil, sem sett er til höfuðs leitarflaggskipinu Google í samkeppnislegu tilliti, hefur göngu sína á Netinu í dag. Cuil er runnin undan rifjum hjónanna Tom Costello og Önnu Patterson en hún kom að hönnun Google-leitarvélarinnar á sínum tíma. Eiginmaður hennar er prófessor í tölvunarfræðum við Stanford-háskólann.

Cuil er ætlað að vera „stærri, hraðvirkari og betri" en Google að sögn þeirra hjóna og mun það einkum vera röðunarkerfi nýju vélarinnar sem ríður baggamuninn. Þannig beitir Cuil greiningu á efni netsíðna við leitina frekar en að nýta sér lykilorð í tenglum sem vísa á síðuna eins og Google gerir en sú aðferðafræði ku vera misvísandi í sumum tilfellum.

Það sem þau hjónin segja þetta tákna á mannamáli er að þegar leitað er að einhverju þekktu nafni eða hugtaki birti leitarvél þeirra sundurliðaðan lista yfir það sem til greina kemur undir sérflipum. Sé leitað að nafninu Harry birtist síða þar sem hægt er að smella á einn flipa fyrir Harry Potter, annan fyrir Harry prins og svo framvegis. Enn frekari sundurliðanir fylgja svo í kjölfarið, undir Harry Potter fást til að mynda vísanir í samstúdenta Potters í galdraskólanum, aðra leikara í myndunum og því um líkt.

Cuil birtir enn fremur myndir með leitarniðurstöðum sínum sem gefa notandanum betri hugmynd um efni viðkomandi vefsíðu. Mesta byltingin felst þó í því að leitarsvið Cuil-leitarvélarinnar spannar að sögn hönnuðanna 120 milljarða netsíðna á móti þeim 40 milljörðum sem þau segja Google búa yfir. Þá fullyrða þau að Cuil sé þrefalt hraðvirkari en Google. Sköpunarverkið birtist netverjum í dag og mun að sögn Costello vera fullþroskuð leitarsíða frá fyrsta degi.

CNET greindi frá.