Á annað hundrað látnir í Mumbai

Meira en 100 eru látnir og 315 særðir í Mumbai á Indlandi eftir árásir hryðjuverkamanna. Umsátursástand er á tveimur stórum hótelum í borginni.

Lögregla hefur fellt eða handtekið nokkra hryðjuverkamenn sem sagðir eru tilheyra samtökunum Deccan Mujahideen. Gíslar eru í haldi á að minnsta kosti tveimur hótelum í Mumbai og ýmislegt bendir til að ráðast hafi átt á fleiri staði, til dæmis fundust átta kílógrömm af sprengiefninu RDX á veitingastað í miðbænum en það er geysiöflugt.

Lögregla segir tilræðismennina hafa verið vel skipulagða þegar þeir lögðu til atlögu á mörgum stöðum samtímis um klukkan hálfsex í gærkvöldi að íslenskum tíma. Meðal annars féllu tugir manna á járnbrautarstöð í Mumbai þar sem árásarmennirnir beittu handsprengjum og hríðskotabyssum gegn mannfjölda sem átti erfitt með að koma sér undan sökum þrengsla.

Þá varð hótelið Taj Mahal illa úti í árásinni ásamt fleiri hótelum og Cama-sjúkrahúsið varð einnig fyrir árás. Svo virðist sem árásarmennirnir hafi miðað út staði þar sem búast mátti við að erlendir ferðamenn hittust fyrir.

Mikil ringulreið ríkir í Mumbai og eldar loga enn víða. Ester Ágústa Berg, sem býr í Mumbai, yfirgaf eitt hótelanna sem ráðist var á örfáum mínútum áður en það gerðist. Fjölskylda hennar er ekki í hættu en mikil óvissa ríkir í borginni um framtíðaröryggi íbúanna, sagði Ester Ágústa í viðtali við Vísi í morgun.