Neita að hafa beitt 50 herþotum í árásum á Georgíu

Rúsar neita að hafa notað fimmtíu herþotur til árásaá skotmörk í Georgíu í nótt líkt og Georgíumenn hafa haldið fram.

Hershöfðingi í rússneska hernum var þó nokkuð óljós í máli á blaðamannafundi í Moskvu í dag þegar hann var spurður um málið. „Við gerum ekkert slíkt. Við erum ekki með 50 þotur á flugi á næturlagi. Hvað ættum við að gera með 50 flugvélar að nóttu til?Ég get ekki staðfest þetta," sagði Anatólí Nogovitsín hershöfðingi.

Hann sagði enn fremur að Rússar hefðu ekki farið yfir inn fyrir landamæri Georgíu við Suður-Ossetíu. Míkhaíl Saakashvili, forseti Georgíu, sagði hins vegar að rússneskir skriðdrekar hefðu verið komnir í fimm kílómetra fjarlægð frá georgísku borginni Gori en þeir hefðu verið hraktir í 20 kílómetra fjarlægð nú.

Georgíumenn saka Rússa enn fremur um að beina spjótum sínum að óbreyttum borgurum og fjarskiptatækjum. Sagði Saakashvili í morgun að 90 prósent þeirra Georgíumanna sem fallið hefðu í átökunum nærri Suður-Ossetíu væru óbreyttir borgarar.