Þrír dagar eru þangað til að Ólympíuleikarniar hefjast í Peking í Kína. Þessa seinustu daga munu ríflega 800 einstaklingar bera eldinn um stund.
Einn þekktasti íþróttamaður landsins - körfuboltastjarnan Yao Ming - bar eldinn yfir Torg hins himneska friðar fyrr í dag. Skömmu áður voru mótmælendur frá Bretlandi og Bandaríkjunum handteknir eftir að þeir létu í ljós skoðanir sínar á mannréttindabrotum í Tíbet í nánd við Ólympíuleikvanginn.
Ólympíueldurinn hefur nú ferðast ríflega 140.000 kílómetra frá því að hann hélt frá Grikklandi 24. mars síðasliðinn. Eldurinn hefur komið við í sex heimsálfum.
Í gær var gengið með hann í gegnum Sichuan-héraðið sem fór afar illa út úr jarðskjálftunum í maí. Einnar mínútu þögn var gerð í borginni Guangan en þar fórst tæplega 70.000 manns í náttúruhamförunum.
