Fjögurra ára dómur fyrir kynferðisbrot gegn systurdætrum

Héraðsdómur Reykjaness hefur dæmt karlmann í fjögurra ára fangelsi fyrir gróf kynferðisbrot gegn tveimur systurdætrum sínum sem stóðu yfir í mörg ár. Þá var hann einnig sakfelldur fyrir að hafa ljósmyndir af annarri stúlkunni sem sýndu hana á kynferðislegan hátt í tölvu sinni.

Manninum var gefið að sök að hafa a tímabilinu 5. desember 1993 til 1. september 1994 í nokkur skipti brotið gegn annarri stúlkunni, sem þá var fimm ára, annars vegar á heimili hans og hins vegar á heimili stúlkunnar.

Þá var hann ákærður fyrir að hafa í nokkur hundruð skipti á árunum 1991-2001, brotið gegn hinni stúlkunni, þegar hún var þriggja til ellefu ára. Þau brot áttu sér stað á þáverandi heimilum stúlkunnar og á heimili ákærða. Maðurinn braut meðal annars gegn stúlkunni þegar hún var búsett ásamt fjölskyldu sinni á heimili hans og voru brotin þá nokkrum sinnum í viku.

Maðurinn játaði á sig brotin gegn stúlkunum og sömuleiðis kannaðist hann við að eiga barnaklámmyndirnar sem um ræddi. Þær sýndu aðra frænku hans á kynferðislegan og klámfenginn hátt og var stúlkan 8 ára á þremur myndanna en 15 ára á tveimur myndanna.

Sýndi einbeittan brotavilja

Í niðurstöðu dómsins segir að um mjög alvarleg og gróf brot að ræða, sem eru margítrekuð og beinast að mjög ungum börnum sem höfðu ekki þroska til að greina alvarleika atferlis ákærða.

„Brotin eru framin á heimili ákærða eða foreldra telpnanna, en hann er bróðir mæðra þeirra og því í sérstöku trúnaðarsambandi við þær og telpurnar og hefur hann gróflega brugðist því trausti sem honum var sýnt," segir í dómnum.

Þá þyki maðurinn hafa sýnt einbeittan brotavilja með því að taka að misnota síðarnefndu stúlkuna þrátt fyrir að móðir hinnar hafi staðið hann að verki við að misnota dóttur sína og hótað honum öllu illu ef hann héldi áfram. Þá þykir það og hafa til þyngingar á refsingu ákærða að hann tælir aðra stúlkuna með því að að gefa henni spil, sælgæti og síðast peninga og svo með því að leyfa henni afnot af tölvu og sjónvarpi.

Auk fangelsisrefsingarinnar var maðurinn dæmdur til að greiða fyrrnefndu stúlkunni hálfa milljón króna í bætur og hinn eina og hálfa milljón króna.