Sinfónían tilnefnd til Grammy-verðlauna

Sinfóníuhljómsveit Íslands hefur verið tilnefnd til Grammy-verðlauna fyrir besta hljómsveitarflutning. Tilnefninguna hlýtur sveitin fyrir geisladisk sinn með hljómsveitarverkum eftir franska tónskáldið Vincent d´Indy, sem kom út hjá bresku Chandos-útgáfunni fyrr á þessu ári. Stjórnandi á disknum er Rumon Gamba, aðalstjórnandi hljómsveitarinnar.

Fimm hljómsveitir eru tilnefndar til verðlaunanna, þeirra á meðal Sinfóníuhljómsveitin í Chicago, sem tímaritið Gramophone útnefndi sem eina af fimm bestu hljómsveitum heims í desemberhefti sínu. Meðal þeirra listamanna sem tilefndir eru til Grammy-verðlauna í öðrum klassískum flokkum má nefna söngkonurnar Ceciliu Bartoli og Anne Sofie von Otter, píanóleikarann Leif Ove Andsnes og hljómsveitarstjórann Sir Simon Rattle.

Í tilkynningu frá Sinfóníuhljómsveitinni segir að tilnefningin sé stórkostlegur heiður fyrir hljómsveitina. „Svona tilnefning er viðurkenning á því að Sinfóníuhljómsveitin er í hæsta gæðaflokki á alþjóðlegan mælikvarða og stenst samanburð við bestu hljómsveitir heims. Við erum ákaflega stolt og þakklát að fá svona klapp á bakið, ekki síst á erfiðum tímum." segir Árni Heimir Ingólfsson, tónlistarstjóri Sinfóníuhljómsveitar Íslands í tilkynningunni.