Upptaka með Lennon ölvuðum seldist á uppboði

Hljóðupptaka frá 1973 af flutningi John Lennon á laginu Just Because, þar sem Bítillinn heitni er greinilega vel við skál, seldist fyrir 30 þúsund dollara á uppboði í Los Angeles um helgina.

Upptakan er rúmar sex mínútur og talsmaður uppboðshússins Bonhams og Butterfields segir það alveg ljóst að Lennon hafi verið búinn að fá sér vel neðan í því þegar hann greip í hljóðnemann. Þá bæti hann sínum eigin textabútum inn í upphaflega textann, sem er eftir Lloyd Price, og útkoman sé hin besta skemmtun.