Telur að Steve Fossett hafi sviðsett dauða sinn

Cynthia Ryan yfirmaður í Flugbjörgunarsveit Bandaríkjanna segir að hún telji að ævintýramaðurinn og auðjöfurinn Steve Fossett hafi sviðsett dauða sinn á síðasta ári.

Fossett er fyrsti maðurinn sem tókst að fljúga hringinn í kringum hnöttinn í loftbelg án þess að stoppa. Hans hefur verið saknað síðan í spetember í fyrra er talið var að lítil flugvél sem hann flaug hefði hrapað til jarðar í Nevada-eyðimörkinni.

Umfangsmesta leit í sögu Bandaríkjanna var gerð að vélinni en til hennar hefur aldrei spurst síðan og engar leyfar á flaki hennar hafa fundist.

Cynthia Ryan segir að hún hafi starfað að björgunarmálum í 14 ár og það sé hennar mat að ef flugvél Fossetts hefði hrapað væri fyrir löngu búið að finna hana. Hún bendir á að meðan á leitinni hafi staðið hafi björgunarmenn fundið flök sex annarra flugvéla sem ekki var vitað um áður.

Ryan telur að Fossett hafi sviðsett dauða sinn vegna persónulegra erfiðleika eða vandamála með fjármál sín.