McCain tók við útnefningu sem forsetaefni repúblikana

Öldungadeildarþingmaðurinn John McCain var í gærkvöldi formlega útnefndur forsetaframbjóðandi Repúblikanaflokksins á flokksþinginu í St. Paul í Minnesota.

Varaforsetaefnið Sarah Palin, ríkisstjóri í Alaska, ávarpaði flokksþingið og þótti takast vel upp. Palin sló á létta strengi í ávarpi sínu og uppskar mikil fagnaðarlæti en hún hefur fram að þessu verið nánast óþekkt utan Alaska.

Hún sagðist vera klár í harðan kosningaslag en repúblikanatvíeykið á óneitanlega á brattann að sækja ef marka má skoðanakannanir. Demókratinn Barack Obama á meiri vinsældum að fagna hvort sem litið er til kannana sem ná til allra Bandaríkjanna eða kannana CNN í einstökum ríkjum.