Prófessor í Helsinki handtekinn fyrir fíkniefnasmygl

Aðstoðarprófessor við Háskólann í Helsinki hefur verið handtekinn vegna gruns um að hann tengist alþjóðlegum fíkniefnasmyglhring sem stundar innflutning til Finnlands.

Prófessorinn var handtekinn í kjölfar umfangsmikillar rannsóknar finnskra fíkniefnalögreglumanna en talið er að hann tengist smyglhring sem starfar í Rússlandi og Eistlandi auk Finnlands. Lögreglan lagði í vor hald á 23.000 e-töflur sem sami hringur flutti inn og samkvæmt fréttaflutningi finnska ríkisútvarpsins tóku böndin að berast að prófessornum eftir að símar nokkurra einstaklinga voru hleraðir.

Alls hafa níu manns verið handteknir vegna málsins en af þeim voru að minnsta kosti tveir handteknir þegar e-töflurnar fundust í vor. Finnska ríkisútvarpið greindi einnig frá því að lögreglan hefði fundið fíkniefni falin í vistarverum Háskólans í Helsinki og hefðu þau verið á vegum mannsins. Réttarhöld í málinu hefjast 17. september.