Obama ætlar að standa við tímaáætlanir í Írak

Forsetaframbjóðandi Demókrataflokksins í Bandaríkjunum, Barack Obama, ætlar að standa við tímaáætlanir um brotthvarf bandarískra hermanna í Írak, nái hann kjöri. Þessu lýsti Obama yfir í Amman, höfuðborg Jórdaníu í dag en Obama hefur verið á ferð um Mið-Austurlönd og hitt þar helstu ráðamenn svæðsins og bandaríska hersins.

Obama hefur frá upphafi verið andvígur stríðinu í Írak og í Amman í dag sagðist hann ætla sjá til þess að bandaríski herinn hverfi frá Írak á fyrstu sextán mánuðum forsetakjörtímabils síns.

Jafnframt taldi Obama að brotthvarf heraflans frá Írak gæfi bandarískum stjórnvöldum meira svigrúm til þess að senda fleiri hermenn til Afganistans en þar hafa fleiri bandarískir hermann fallið undanfarnar vikur en í Írak. Væri það merki þess að al-Kaída samtökunum hafi vaxið ásmegin og við því þyrfti að sporna.