Vilja að vændi verði leyfisskylt í Danmörku

Mannréttindastofnun Danmerkur hefur lagt til að ríkisvaldið þar í landi gefi út sérstök leyfi fyrir þær vændiskonur sem stunda iðju sína af fúsum og frjálsum vilja.

Samtímis leggur stofnunin til að það verði gert ólöglegt og háð viðurlögum fyrir viðskiptavini að nýta sér þjónustu þeirra vændiskvenna sem ekki hafa slíkt leyfi fyrir starfsemi sinni.

Blaðið Politiken greinir frá þessu í dag og þar segir að Mannréttindastofnunin telji að með þessu móti sé hægt að koma í veg fyrir mansal með erlendar vændiskonur til Danmerkur sem síðan eru neyddar til að stunda iðju sína á götum úti í borgum landsins.

Politiken ræðir við Birgitte Kofod Olsen aðstoðarforstjóra stofnunarinnar sem segir að það eigi svo að vera á ábyrgð viðskiptavinarins að tryggja að hann sé að kaup sér þjónustu hjá vændiskonu sem hafi leyfi til starfsemi sinnar og hafi þar með ekki verið þvingað til vændis.

Með tillögunni er ætlunin að gera það auðveldara fyrir lögreglu að bera kennsl á þær konur sem vinna undir hótunum og einnig að refsa viðskiptavinum þeirra.