Nýja-Ísland, hvenær kemur þú?

„Getum við byrjað að reka Nýja-Ísland með gamla gjaldmiðlinum?" spurði Þorsteinn Pálsson, ritstjóri Fréttablaðsins, í viðtali við Björn Inga Hrafnsson í þættinum Markaðurinn með Birni Inga nú fyrir hádegið.

Sagði Þorsteinn að Sigríður Ingibjörg Ingadóttir, fyrrum bankaráðsmanneskja Seðlabanka Íslands, hafi axlað ábyrgð með því að segja sig úr bankaráðinu á fimmtudaginn.

Í þættinum sýndi Björn Ingi brot úr viðtali BBC við breska forsætisráðherrann Gordon Brown fyrr í vikunni þar sem ráðherrann var harðorður í garð Íslendinga. Sagði Brown meðal annars að íslensk stjórnvöld yrðu að axla ábyrgð og Íslendingum bæri skylda til að greiða Bretum innstæður þeirra til baka.

Vopnin eru yfirvegun og rökfesta

Þorsteinn sagði samskiptin við Breta hafa verið góð þann tíma sem hann sat sem sendiherra Íslands í London. „Við eigum fá vopn önnur í stöðunni en yfirvegun og rökfastan málflutning," sagði Þorsteinn og bætti því við að Geir H. Haarde forsætisráðherra hefði þegar beitt þeim vopnum. „Það er mikilvægt að góðu sambandi við Breta verði viðhaldið frekar en að standa í orðaskaki," sagði ritstjórinn enn fremur.

Þegar Björn Ingi innti Þorstein eftir því hvaðan útrásarpeningarnir hefðu eiginlega komið svaraði Þorsteinn því til að þeir hefðu að langmestu leyti verið teknir að láni. Íslenskar bankastofnanir hefðu verið að stíga sín fyrstu skref í Bretlandi meðan á dvöl hans þar stóð og peningastefna íslenskra stjórnvalda hefði einfaldlega ekki virkað sem skyldi heldur lokkað til sín braskara. Margir samverkandi þættir hefðu svo leitt til þess sem að lokum gerðist.

„Peningastefnan hefur verið mjög umdeild um nokkurn tíma og ávinningurinn af því að reka sjálfstæða mynt er vafasamur. Mistökin liggja víða og koma þyngra niður á okkur vegna þess hve veikan gjaldmiðil við höfum," sagði Þorsteinn, „Ég held að á þessari stundu sé hættulegt að sökkva sér niður í umræðu um einstaka hluti og hvað hver sagði [...]. Við þurfum að halda atvinnulífinu gangandi, við höfum ekki orku og tíma í annað."

Spurningin um ESB áleitnari og brýnni

„Er hægt að slá skjaldborg um Seðlabanka Íslands á meðan hann nýtur ekki trausts?" spurði Björn Ingi Þorstein sem svaraði því til að bankarnir þyrftu að vinna traustið aftur. Ein leiðin væri að skipta um bankastjóra og nú væri bara að bíða og sjá hvað ríkisstjórn Íslands hygðist gera. „Ekki má skella allri skuldinni á Seðlabankann og við þurfum að hraða því að byggja traustið upp aftur, til dæmis með því að ganga til samstarfs við Alþjóðagjaldeyrissjóðinn," sagði Þorsteinn.

Hann sagði spurninguna um aðild að Evrópusambandinu verða áleitnari og brýnni eftir því sem tíminn liði. Með ESB-aðild yrði skipt um efnahagsumhverfi á Íslandi og efnahagsákvarðanir teknar með aga.