Klífur tinda til styrktar krabbameinsrannsóknum

Vignir Helgason, doktor í líffræði við Paul O'Gorman-krabbameinsrannsóknarstöðina í Glasgow í Skotlandi, hyggst þreyta hina nafntoguðu þriggjatindaáskorun, eða three peaks challenge, sem gengur út á að ná toppi hæstu fjalla Englands, Skotlands og Wales á 24 klukkustundum.

Tilgangurinn með þrekvirkinu er ekki eingöngu holl útivera og hreyfing heldur hyggst Vignir klífa tindana til styrktar Paul O'Gorman-rannsóknarstöðinni þar sem fram fara rannsóknir á hvítblæði sem hann stundar ásamt öðrum.

„Eins og er þá erum við 17 manna hópur sem ætlum í gönguna," segir Vignir. „Mikið af þeim fjármunum sem renna til Paul O´Gorman kemur með góðgerðastarfsemi og fjáröflunum. Í þessu tilviki er það strákur að nafni Matt Sinclair sem er drifkrafturinn að söfnuninni. Matt greindist með CML, sem er ein tegund hvítblæðis, árið 2005, þá 27 ára gamall. Síðan þá hefur hann verið mjög duglegur að safna peningum sem hann lætur renna til Paul O´Gorman-stofnunarinnar og eru notaðir í rannsóknir á þessari tegund hvítblæðis," útskýrir Vignir enn fremur.

Strembinn sólarhringur

Fjallstindarnir sem um ræðir eru Scafell í Englandi (978 m), Ben Nevis í Skotlandi (1.344 m) og hið velska Snowdon (1.085 m). Hópur Vignis hyggst leggja upp frá Glasgow 21. júní kl. 9 árdegis. „Við byrjum á að ganga upp á Ben Nevis um kl. 12:00 og ferðumst með tveimur mini-busum á milli fjalla. Það ætti að taka 5 - 6 tíma. Svo keyrum við til Englands og löbbum á Scafell um kl. 22:00 og ættum að ljúka við það um 3 um nóttina. Keyrum þaðan til Wales og ljúkum við Snowdon, vonandi fyrir 12:00," segir Vignir.

Meðal þeirra sem ganga með Vigni eru yfirmaður Paul O'Gorman-stofnunarinnar, prófessor Tessa Holyoke, og hvítblæðissjúklingurinn Matt Sinclair. „Síðan ég kom hingað til Skotlands hef ég farið í allmargar fjallgöngur um skosku hálöndin. Grunnþolið er ágætt og því vona ég að ég þurfi ekki að æfa sérstaklega fyrir þessa göngu. Ég held að þetta verði mjög þreytandi en með keppnisskapi og þrjósku ætti þetta nú að hafast. Aðalatriðið er að sleppa við álagsmeiðsli, blöðrur og fleira sem myndi gera gönguna mun sársaukafyllri," segir Vignir að lokum.

Vísir tekur púlsinn á göngugörpunum þegar nær dregur en lesa má meira um söfnunina og tindana þrjá á heimasíðu Vignis, www.justgiving.com/gvignir.