Geta ekki tryggt öryggi friðargæsluliða í Súdan

Yfirvöld í Súdan segjast ekki geta tryggt öryggi friðargæsluliða Sameinuðu þjóðanna og Afríkusambandsins verði forseti landsins ákærður fyrir stríðsglæpi.

Aðstoðarmaður Omars al-Bashirs forseta sagði þetta í samtali við fréttamann breska útvarpsins í dag. Hann tók fram að ekki væri verið að setja fram hótun í garðs friðargæsluliðsins - málið horfði einfaldlega svona við stjórn sinni.

Fréttir um ákæruna hafa vakið nokkurn usla í Súdan og Afríkubandalagið hefur lagst gegn áformum saksóknarans sem það segir ekki til framdráttar friðarumleitunum í landinu.

Ákæran á hendur forsetanum sakar hann um þjóðarmorð, stríðsglæpi og glæpi gegn mannkyninu vegna framgöngu stjórnarhersins og vígasveita hans í Darfúr héraði, þar sem kvartmilljón manna hefur látið lífið á síðustu fimm árum.

Sveit uppreisnarmanna í Darfúr, sem hefur átt samstarf við Khartúm-stjórnina, sagði í dag að stjórnarherinn hafi gert árásir á þorp í héraðinu fyrr í þessari viku - á meðan al-Bashir forseti var að halda ræðu fjörutíu kílómetrum sunnar.