Samfylkingarmenn á Akureyri lýsa yfir stuðningi við sjónarmið Ingibjargar Sólrúnar

Jafnaðarmenn á Akureyri lýsa yfir fullum stuðningi við þau sjónarmið sem formaður flokksins Ingibjörg Sólrún Gísladóttir hefur nýverið sett fram um Evrópusambandið.

Í sameiginlegri ályktun frá Samfylkingunni á Akureyri, samtökum eldri samfylkingarmanna á Akureyri og Ungum jafnaðarmönnum á Akureyri segir að innganga í ESB sé eitt brýnasta hagsmunamál þjóðarinnar. Með sama hætti og hin íslenska landsbyggð þurfi á jafnaðarhugsjóninni að halda, sé aðild að Evrópusambandinu efnahagsleg og félagsleg nauðsyn fyrir íbúa þessa lands.

„Að loknum ragnarökum nýfrjálshyggjunnar, sem við nú verðum vitni að, verður ríkisstjórnin að skilgreina samningsmarkmið aðildarviðræðna vegna inngöngu í ESB. Að þeim loknum fari fram þjóðaratkvæðagreiðsla um fulla aðild að Evrópusambandinu og upptöku Evru sem framtíðar gjaldmiðils þjóðarinnar," segir í ályktuninni.