Fimm ára fangelsi fyrir hommabrandara um páfann?

Ítalskur grínisti gæti átt yfir höfði sér fimm ára fangelsi takist saksóknara þar í landi að fá hann sakfelldan fyrir að atast í páfanum.

,,Innan 20 ára mun páfinn vera þar sem hann á heima, í helvíti þar sem samkynhneigðir djöflar munu pína hann," lét grínistin Sabina Guzzanti út úr sér á dögunum og vísaði þar meðal annars til andstöðu Páfagarðs við hjónabönd samkynhneigðra.

Guzzanti hefur með þessu bakað sér reiði saksóknara í landinu. Eftir því sem breska blaðið Times greinir frá reynir saksóknarinn nú að höfða mál á hendur Guzzanti á grundvelli gamals samkomulags milli ítölsku ríkisstjórnarinnar og Vatíkansins sem gert var í tíð fasistaleiðtogans Mussolinis í kringum 1930. Samkvæmt því má ekki móðga páfann frekar en forseta landsins.

Fregnir af hugsanlegri saksókn hafa vakið sterk viðbrögð á Ítalíu, þar á meðal hjá rithöfundum landsins sem telja brotið á málfrelsinu verði Guzzanti saksótt. Þá segir faðir Guzzanti að saksóknari hagi sér líkt og á miðöldum og leggur til að kannski ætti dóttir hans að ganga á glóandi kolum vegna orða sinna.