Ásaka fyrirrennara XL Leisure um bókhaldssvindl

KPMG endurskoðunarfyrirtækið í Bretlandi sakar stjórn Exel Airways, sem síðar varð XL Leisure Group, um bókhaldssvindl til að fegra fjárhagsstöðu fyrirtækisins áður en móðurfélag þess - Avion - var skráð í Kauphöll Íslands. Hafi þetta verið gert vísvitandi er það alvarlegt brot á bókhaldslögum og lögum um skráningu félaga í kauphöllum.

Breskir fjölmiðlar greina frá því í dag að KPMP endurskoðunarfyrirtækið hafi sagt skilið við Excel Airways í október 2006, vegna þess að fyrirtækið hafi ekki tekið tillit til ábendinga KPMG um bókhaldsóreiðu, sem hafi verið til þess fallin að fegra fjárhagsstöðu íslenska móðurfélagsins Avion, áður en félagið var skráð í Kauphöll Íslands 20. janúar 2006.

Nafni Excel Airways var breytt í XL Leasure Group í nóvember 2006, en það fyrirtæki er nú farið á hausinn með miklum hvelli. Avion, sem er í eigu Magnúsar Þorsteinssonar, keypti Eimskip í maí 2005 og við það hvarf Avion nafnið og fyrirtækið hefur heitið Eimskip eftir það. En við gjaldþrot XL féll 27 milljarða lán XL á Eimskip, sem Björgólfsfeðgar, fyrrverandi viðskiptafélagar Magnúsar, gengu í ábyrgð fyrir á dögunum.

Ásgeir Friðgeirsson talsmaður Landsbankans sem er aðalviðskiptabanki Eimskipa, sagði Stöð 2 á föstudag og bankinn teldi að öll vandræði Eimskipa væru nú komin upp á borðið. Ef það reynist hins vegar rétt að stjórnendur Excel Airways, nú XL flugfélagsins, hafi vísvitandi fegrað bókhald sitt til að gera Avion móðurfélagið verðmeira þegar það var skráð í Kauphöll Íslands, er um mjög alvarlegt brot á bókhaldslögum og lögum um skráningu félaga í kauphöll að ræða.

Bókhaldsóreiðan hjá Excel Airways fólst í því samkvæmt samkvæmt heimildum breskra fjölmiðla, að greina ekki frá skuldum félagsins við stóran þjónustuaðila í flugveitingum. Sérfræðingar í lögum og reglum um kauphallarviðskipti sögðu fréttastofu í dag, að ef þarna reyndist vera um vísvitandi bókhaldssvindl að ræða sem hefði veruleg áhrifná verðmat Avion, gætu kaupendur á hlutabréfum í Avion átt skaðbótarétt gegn fyrirtækinu og þar gæti verið um stórar upphæðir að ræða. Það er því ekki víst að ábirgðum Eimskips á þessu óláns flugfélagi sé lokið, sem aftur gæti haft áhrif á Landsbankann og eigendur hans.