Samkynhneigðum ekki lengur heimilar vígslur

Borgaryfirvöld í Los Angeles eru hætt að veita samkynhneigðum hjúskaparleyfi í kjölfar atkvæðagreiðslu íbúa Kaliforníuríkis.

Þeim áfangasigri sem samkynhneigðir íbúar Kaliforníu unnu með úrskurði hæstaréttar ríkisins í maí hefur nú verið hrundið með atkvæðagreiðslu íbúanna. Hæstiréttur úrskurðaði á sínum tíma að lög sem bönnuðu hjónabönd samkynhneigðra stæðust ekki og 17. júní hófust hjónavígslur af svo miklum krafti að sprenging varð í ferðaþjónustubransanum í Kaliforníu á meðan önnur ríki löptu dauðann úr skel vegna hækkandi bensínverðs og samdráttar í öllum ferðalögum.

Nú hefur samdrátturinn hins vegar teygt sig víðar og klukkan hálftólf í gærkvöldi höfðu 52 prósent íbúa Kaliforníu samþykkt breytingu á stjórnarskrá ríkisins sem felur í sér nýtt bann við hjónaböndum samkynhneigðra. Þessari réttarheimild fær hæstaréttarúrskurður ekki hrundið svo verulegt bakslag virðist komið í réttindabaráttu samkynhneigðra í ríkinu.

Kjósendur í Arizona og Flórída hafa tekið sama pólinn í hæðina og næst á dagskrá er kosning um nýjar fóstureyðingarreglur sem skylda lækna til að tilkynna foreldrum fólks undir 21 árs aldri um væntanlega fóstureyðingu hjá barni þeirra minnst 48 stundum fyrir aðgerðina.