Samningaviðræðum við Heilsuverndarstöðina slitið

Velferðarráð Reykjavíkur ákvað á fundi sínum fyrr í dag að slíta samningaviðræðum við Heilsuverndarstöðina um rekstur áfangaheimilis í Norðlingaholti.

Fyrirhugað var að opna í haust áfangaheimili í Hólavaði í Norðlingaholti á vegum Heilsuverndarstöðvarinnar. Vísir greindi frá því í júlí að eigandi raðhúsalengjunnar við Hólavað var lýstur gjaldþrota í apríl. Einn kröfuhafa leysti eignir fyrirtækisins til sín.

Stellu Víðisdóttur, sviðsstjóra velferðarsviðs, var á fundinum falið að skoða málið frá grunni og ræða á ný við þá fjóra aðila sem sóttust eftir samstarfi og koma með tillögu til velferðarráðs í kjölfar þess.

Jórunn Frímannsdóttir, formaður velferðarráðs, segir að það sé leitt að samningaviðræðurnar við Heilsuverndarstöðina hafi ekki gengið upp. Miklar væntingar hafi verið bundnar við áfangaheimilið og hugmyndafræði fyrirtækisins.

Jórunn er vongóð um það skynsamleg tillaga komi frá sviðinu um framhaldið. ,,Mikilvægast er að við náum að þjónusta þennan hóp sem þarf nauðsynlega á búsetuúrræði að halda."

SÁÁ og Vinstri grænir gagnrýndu í byrjun sumars ákvörðun velferðarráðs að ganga til samninga við Heilsuverndarstöðina þar sem tilboð SÁÁ var lægra. Við val á samstarfsaðila hafði talsverð áhrif að Heilsuverndarstöðin hafði til taks ,,afar hentugt húsnæði fyrir umrædda starfsemi."

Í júlí afhentu íbúar í Norðlingaholti Ólafi F. Magnússyni, þáverandi borgarstjóra, ríflega 300 undirskriftir íbúa í hverfinu sem andsnúnir eru staðsetningu áfangaheimilisins. Borgaryfirvöld voru gagnrýnd fyrir að hafa ekki kynnt fyrirhugað heimili og starfsemina fyrir sér.

Eftirfarandi tillaga var lögð fyrir velferðarráð í dag:

Í kjölfar yfirlýsingar sem Velferðarsviði Reykjavíkurborgar barst frá Heilsuverndarstöðinni/Alhjúkrun í dag samþykkti velferðarráð samhljóða tillögu meirihluta velferðarráðs þar sem lagt er  til að viðræðum Velferðarsviðs við Heilsuverndarstöðina/Alhjúkrun verði hætt. Í yfirlýsingunni kom fram að Heilsuverndarstöðin/Alhjúkrun geti ekki staðfest að húsnæðið að Hólavaði 1-11 sé fyrir hendi.

Sviðsstjóra Velferðarsviðs hefur verið falið að skoða málið frá grunni, þ.m.t. að ræða á ný við þá fjóra aðila sem sóttust eftir samstarfi og koma með tillögu til velferðarráðs í kjölfar þess.