Vilja að viðræðum við Heilsuverndarstöðina verði slitið

Vinstri grænir vilja að samningaviðræðum velferðarráðs Reykjavíkur við Heilsuverndarstöðina um rekstur fyrirhugaðs áfangaheimilis í Hólavaði verði slitið. VG vill að teknar verði upp viðræður við SÁÁ með það að markmiði að heimilinu verði komið fyrir á landi samtakanna í Vík á Kjalarnesi.

,,Það er tímabært að höggva á hnútinn í þessu erfiða máli og borgarfulltrúum er skylt að hafa það í huga að hagsmunir þeirra sem eiga að njóta úræðisins og hefur ekki verið sinnt í meira en eitt og hálft ár eiga að vera í fyrirrúmi," segir í bókun sem Þorleifur Gunnlaugsson, borgarfulltrúi VG, lagi fyrir borgarráð fyrr í dag.

Fyrirhugað er að í haust opni áfangaheimili í Hólavaði 1 til 11 í Norðlingaholti á vegum Heilsuverndarstöðvarinnar. Vísir greindi frá því í júlí að eigandi raðhúsalengjunnar við Hólavað var lýstur gjaldþrota í apríl. Einn kröfuhafa, Byr Sparisjóður, leysti eignir fyrirtækisins til sín.

SÁÁ og Vinstri grænir gagnrýndu ákvörðun velferðarráðs Reykjavíkur að ganga til samninga við fyrirtækið þar sem tilboð SÁÁ var lægra. Við val á samstarfsaðila hafði talsverð áhrif að Heilsuverndarstöðin hafði til taks ,,afar hentugt húsnæði fyrir umrædda starfsemi."

10. júlí afhentuíbúar í Norðlingaholti Ólafi F. Magnússyni, borgarstjóra, ríflega 300 undirskriftir íbúa í hverfinu sem andsnúnir eru staðsetningu áfangaheimilisins. Þeir gagnrýndu borgaryfirvöld fyrir að hafa ekki kynnt fyrirhugað heimili og starfsemina fyrir sér.

Stella Víðisdóttir, sviðsstjóri velferðarsviðs Reykjavíkurborgar, sagði í samtali við Vísi 21. júlí að beðið væri eftir að málefni fyrirhugaðs áfangaheimilis í Hólavaði skýrist og því væri enn óvissa um hvort og hvenær starfsemi þess hefjist.

Bókun borgarfulltrúa VG:

Það er nú endanlega ljóst að húsnæði það sem Heilsuverndarstöð/Alhjúkrun hampaði í tilboði sínu og talin hefur verið veigamikill þáttur röksemdafærslu fyrir því að taka ekki lægsta tilboði, var komið í gjaldþrotaskipti áður en tillaga um úrræðið var lögð fyrir velferðarráð 9. apríl. Gögn sem lögð voru fyrir borgarráð frá Hag ehf. reyndust auk þess einskisverður pappír og var borgarráð þar með blekkt. Þetta er í sjálfu sé næg ástæða fyrir því að slíta samningsviðræðum.

Veruleg andstaða er í Norðlingaholti gegn þessari viðamiklu og viðkvæmu starfsemi sem sennilega er betur sett fyrir utan þéttbýlið með hagsmuni þjónustuþega í huga. Svo heppilega vill til að SÁÁ á land við meðferðastöðina Vík á Kjalarnesi sem búið er að skipuleggja og auðvelt væri að byggja þar yfir viðkomandi búsetuúrræði.

Það er tímabært að höggva á hnútinn í þessu erfiða máli og borgarfulltrúum er skylt að hafa það í huga að hagsmunir þeirra sem eiga að njóta úrræðisins og hefur ekki verið sinnt í meira en eitt og hálft ár eiga að vera í fyrirrúmi. Búsetuúrræði í tengslum við meðferðarstað á útmörkum borgarinnar væri æskilegur kostur með tilliti til batamöguleika þessa fólks. Það eru því sár vonbrigði að enn skuli málinu vera frestað.