Ferðalesari greinir fingraför breskra sakamanna

Bresk lögregla verður að öllum líkindum innan skamms búin ferðafingrafaralesurum til að ganga úr skugga um persónu þeirra sem hún hefur afskipti af. Um er að ræða tilraunaverkefni sem gengur undir heitinu MIDAS (The Mobile Identification At Scene sem ef til vill mætti þýða sem hreyfanlega vettvangskennslarann) og er gert ráð fyrir að mestallt lögreglulið Englands verði búið þessum grip innan 18 mánaða reynist tilraunin vel.

Geoff Whitaker hjá starfsþróunarstöð lögreglunnar (National Policing Improvement Agency (NPIA)) segir þann tíma sem fer í að taka fingrafarasýni af viðskiptavinum lögreglu vera að meðaltali 67 mínútur í hvert skipti. Hann segir þann tíma reiknaðan yfir í launakostnað jafngilda 366 stöðugildum lögregluþjóna svo sparnaðurinn hljóti að teljast umtalsverður. Whitaker segir tækið ekki eingöngu nýtast við hefðbundin lögreglustörf heldur megi beita því við landamæraeftirlit og til að kanna bakgrunn gesta á íþróttaviðburðum og tónleikum.

Ferðalesarinn greinir fingrafar viðkomandi á staðnum, eins og nafnið gefur til kynna, og ber saman við gagnagrunn lögreglunnar sem geymir upplýsingar um 7,5 milljónir sakamanna ásamt fingrafarasýni.

Mannréttindafrömuðir hafa að sjálfsögðu skoðanir á þessari innrás í einkalíf almennings og hafa mannréttindasamtökin Liberty sent frá sér yfirlýsingu þar sem meðal annars kemur fram að gera megi þá lágmarkskröfu að lögregla eyði samstundis þeim gögnum sem safnað er á þennan hátt eftir notkun þeirra. Lögreglan segist ekki sjá neina meinbugi á því að svo verði.