Félag í eigu Jóns Ásgeirs kaupir alla fjölmiðla 365

Stjórn 365 samþykkti á stjórnarfundi í gær að selja alla fjölmiðla út úr fyrirtækinu til félags í eigu Jóns Ásgeirs Jóhannessonar. Með í kaupunum fylgir 36,5% hlutur í Árvakri, útgáfufélagi Morgunblaðsins.

Þetta kom fram í hádegisfréttum RUV. Undir 365 miðla heyrir meðal annars rekstur Stöðvar 2, Bylgjunnar og Fréttablaðsins. Sena rekur hinsvegar meðal annars nokkur kvikmyndahús auk þess að vera stærsti útgefandi íslenskrar tónlistar hér á landi og umboðsaðili erlendrar tónlistar.

Samkvæmt heimildum RUV fundaði stjórn móðurfélagsins í gær og þar var farið yfir stöðuna. Fyrir fundinum lá tilboð frá félagi sem heitir Rauðsól ehf. en það er í eigu Jóns Ásgeirs Jóhannessonar. Vildi Rauðsól greiða 365 einn og hálfan milljarð fyrir fjölmiðlahluta 365 og taka til viðbótar yfir rúmlega 2 milljarða af skuldum félagsins.

Skemmst er frá því að segja að stjórn 365 samþykkti tilboðið með öllum greiddum atkvæðum nema einu.

Árni Hauksson, stjórnarmaður, greiddi atkvæði gegn tillögunum og sagði sig raunar úr stjórn 365 í kjölfarið.