Kemur heim frá Kanarí fyrir jól

Guðni Ágústsson fyrrverandi formaður Framsóknarflokksins hefur dvalið á Gran Canaria undanfarið ásamt eiginkonu sinni Margréti Hauksdóttur. Þau hjónin fóru út skömmu eftir að Guðni sagði af sér formennsku og þingmennsku. Í samtali við Vísi segir Margrét þau ætla að koma heim fyrir jól.

„Við ætlum ekki að vera úti yfir jólin í þetta skiptið," segir Margrét í samtali við Vísi. Hún sagði Guðna ekki ætla að ræða við fjölmiðlamenn á meðan hann væri úti þegar blaðamaður falaðist eftir viðtali.

Miklar hræringar hafa verið í framsóknarflokknum undanfarið og hafa nú þrír aðilar tilkynnt um formannsframboð á landsfundi flokksins í janúar. Það eru þeir Páll Magnússon, Höskuldur Þórhallsson og Jón Vigfús Guðjónsson sjómaður frá Akureyri.

Eins og fyrr segir hefur Guðni haldið til á Gran Canaria undanfarið og verið þar í hópi kátra íslendinga. Meðal annars hefur hann gert sér dagamun á Klöru-bar sem er nokkurskonar „íslendinga-bar" á eyjunni.

Á meðfylgjandi mynd má sjá Guðni taka þátt í fimleikaatriði á Klörubar.