200 diskum stolið af Klingenberg

„Þetta er náttúrlega mikill missir og fjárhagslegt tjón," segir Sigríður Klingenberg spákona sem lenti í því að 200 geisladiskum var stolið af heimili hennar. Diskarnir sem um ræðir voru fyrsta upplagið af nýjum sjálfshjálpardiski Sigríðar, Þú ert frábær, sem hún framleiddi sjálf í þeim tilgangi að hressa upp á fólk.

„Þetta voru diskar sem ég var að klára að pakka og lágu á stofuborðinu hjá mér. Það eru liðnar um þrjár vikur síðan, en ég trúði bara ekki strax að þeim hefði verði rænt og vonaði að það væri önnur skýring á þessu," segir Sigríður, en ekki alls fyrir löngu var Playstation 3 tölvu og flakkara stolið af heimili hennar.

Auk diskanna hvarf einnig kristalskúla frá Prag sem Sigríður hélt mikið upp á.

„Kannski að þjófurinn vilji skyggnast inn í framtíðina, en mér finnst merkilegt að einhver skuli vera á svo miklum bömmer að hann þurfi 200 diska til að hressa sig við. Viðkomandi hlýtur allavega að hafa fundist hann athyglisverður," segir Sigríður og brosir, en viðurkennir að kostnaður við framleiðslu diskanna hafi verið um 400.000 krónur.

„Ég er komin með annað upplag núna, en ég vona að diskarnir sem var stolið fari samt í dreifingu með einum eða öðrum hætti og breyti lífi þeirra sem kaupa þá. Ég ber engan kala til neins, en mér þætti vænt um að vita hvar þetta er niðurkomið og myndi ekki vera með nein eftirmál ef ég fengi ábendingar um það," segir Sigríður sem vonast til að fá upplýsingar í gegnum heimasíðu sína www.klingenberg.is.