Mandelson snýr aftur

Peter Mandelson mun snúa aftur í bresku ríkisstjórnina, að því er fréttastofa Reuters greinir frá. Mandelson hefur síðustu ár gegnt embætti framkvæmdastjóra viðskiptamála hjá Evrópusambandinu.

Gordon Brown hefur ákveðið að stokka rækilega upp í ríkisstjórn sinni og mun John Hutton, viðskiptaráðherra taka við embætti varnarmálaráðherra. Þá tekur Geoff Hoon við af Ruth Kelly sem ráðherra samgöngumála en Kelly sagði af sér í síðasta mánuðu til þess að geta einbeitt sér að fjölskyldu sinni.

Stærstu fréttirnar í þessari uppstokkun eru án efa endurkoma Peters Mandelson í breskt stjórnmálalíf. Hann er meðal arkitekta "New labour" sem Tony Blair leiddi til valda í Bretlandi. Hann var um langan tíma einn helsti ráðgjafi og stuðningsmaður Blair og Brown og gegndi tvívegis ráðherraembættum í ríkisstjórn Blairs en þurfti í bæði skiptin að segja af sér í skugga spillingamála.